اے شمعِ کوئے جاناں

اے شمعِ کوئے جاناں

ہے تیز ہوا ، مانا

لَو اپنی بچا رکھنا ۔ رستوں پر نگاہ رکھنا

ایسی ہی کسی شب میں

آئے گا یہاں کوئی ، کچھ زخم دکھانے کو

اِک ٹوٹا ہوا وعدہ ، مٹی سے اُٹھانے کو

پیروں پہ لہو اُس کے

آنکھوں میں دھواں ہوگا

چہرے کی دراڑوں میں

بیتے ہوئے برسوں کا

ایک ایک نشاں ہوگا

بولے گا نہ کچھ لیکن ، فریاد کُناں ہوگا

اے شمعِ کوئے جاناں

وہ خاک بسر راہی --------- وہ سوختہ پروانہ

جب آئے یہاں اُس کو مایوس نہ لوٹانا

ہو تیز ہوا کتنی ، لَو اپنی بچا رکھنا

رستوں پہ نگاہ رکھنا -------- راہی کا پتا رکھنا

اِس بھید بھری چُپ میں اِک پھول نے کھلنا ہے !!

!!اُس نے انہی گلیوں میں ، اِک شخص سے ملنا ہے