مجھ کو باتیں کب آتی ہیں؟

مجھ کو باتیں کب آتی ہیں؟

میں تو بس خاموش سی لڑکی

الفت، چاہت کے رنگوں سے

دل کی خالی تصویروں میں

کوئی محبت بھر دیتی ہوں

اور کبھی اپنے اشکوں سے

بنجر اس من کی دھرتی پر

کوئی محبت بودیتی ہوں

اور کبھی دیوار سے لگ کر

کوئی محبت رو دیتی ہوں

اور کبھی آنکھوں آنکھوں میں

ساری باتیں کہہ جاتی ہوں

میں اپنے اس پاگل پن میں

کتنی تنہا رہ جاتی ہوں

میں تو اک خاموش سی لڑکی

مجھ کو باتیں کب آ تی ہیں؟

مجھ کو باتیں گر آتیں تو!

کیا تم مجھ کو چھوڑ کے جاتے؟

میرے سپنے توڑ کے جاتے؟

کیا میری آنکھوں میں غم کے

اتنے آنسو دے سکتے تھے؟

میرا کل سرمایہ تھا جو

کیاوہ مجھ سے لے سکتے تھے؟

گر مجھ کو باتیں آتیں تو!

اپنے لفظوں کے جادو سے

میں بھی تم کو خواب دکھاتی

تم سے ڈھیروں پیار جتاتی

تم کو اپنا میت بناتی

میں بھی تم سے وہ سب کہتی

جو تم سننے کی خواہش میں

مجھ کو ایسے چھوڑ گئے ہو

سارے رشتے توڑ گئے ہو

میں ٹہھری خاموش سی لڑکی

مجھ کو باتیں کب آتی ہیں

مجھ کو باتیں گر آتیں تو

تم بھی مجھ کو میت بناتے

میرے سارے خواب سجاتے

یوں نہ تنہا چھوڑ کے جاتے

میں ٹہھری خاموش سی لڑکی

کاش مجھے بھی باتیں آتیں