Zindagi Gulzar Hai

Mein miss karoongi? Miss tou shaid ek chota lafz hai inn ehsaasaat k liye jo mai tumhare liye rakhne lagi hoon aur ab mai apne aap se darnay lagi hoon.

Kissi se muhabbat insaan ko bohat kamzor kar deti hai, bohat bebas, majboor, mahkoom aur mujhe inn teenon cheezon se nafrat hai. Lekin uske bawajood tum meri zindagi ka markaz bante jaa rahe ho.

Tum mujhse puchte ho kay mujhe tumhari kia baat achi lagti hai? Mein tumse ye kaisay kahoon ke mujhe tumhari kaunsi baat achi nahi lagti?
Apne ird gird tumhara ghoomna, mere wajood se na hatnay waali tumhari gehri bolti nazrein, tumhari har waqt ki tawajja, tumhari jaan chidaknay wala har andaaz. Har baar jab tum mere maa baap k liye ehteraam mein khade hotay hoo tou mein tumhare saamne jhukne lagti hoon. Aur kia kuch nahi jo mujhe tumhare saamne moom nahi karta.

Aik chotay ghar kay iss pankhe waalay kamre mein tumhari ye gehri neend. Mineral water bottle ko dhoondne ke bajaye nalke ka paani pi lena. Hand wash chodd kay aik sastay saabun se haath dhona. Apni plate ko meri maa kay haath kay pakay khaanay se baar baar bharna. Per mein ye sab tumhe kabhi nahi bataayungi, tumhare har waaday per hassoongi, tumhari har baat ka mazaak uraayun gi. Tum mujhe sangemarmar samjhte ho, tou samajhte raho, mein tumhaare saamne reth ki deewar nahi ban sakti, mujhe toot jaanay se khof aata hai.