بڑی لمبی کہانی ہے

بڑی لمبی کہانی ہے

جسے ہَم زندگی کا نام دیتے ہیں

فقط اک جستجو ہے ایک خواہش کی روانی ہے

بڑی لمبی کہانی ہے

ابھی احساس آنکھیں موند کر چُپ چاپ سوتا ہے

ہماری داستان کا اس طرح آغاز ہوتا ہے

فقط آنکھوں کی جنبش اور رگ جان کی حرارت سے

ہماری زندگی منسوب ہوتی ہے

مگر کھلتی ہیں جب احساس کی آنکھیں

تو کتنے رنگ خواہش کے ہمارے دِل میں ہوتے ہیں

جنہیں ہَم لے کے چلتے ہیں

کسی اپنے کے ہاتھوں کو پکڑ کر ساتھ چلنے کی تمنا دِل میں ہوتی ہے

مگر وہ اک ضرورت سے کبھی آگے نہیں بڑھتی

کبھی اس کے نہ ہونے سے رگوں میں دوڑتے لمحے نہیں رکتے

نئے کوسیکھنےکے واسطے اک جستجو پروان چڑھتی ہے

تو پل پل ساتھ رہتی ہے

کبھی کاغذ کی کشتی میں کبھی کچے گھروندوں میں

کبھی جگنو پکڑنے میں کبھی تتلی کے رنگوں میں

ہماری ہر خوشی ہنستی ہے لمحےمسکراتے ہیں

کھلونے ٹوٹ جائیں تو ہمیں راتوں جگاتے ہیں

یہی خوشیاں یہی معصوم دُکھ دن رات رہتے ہیں

انہیں ہَم زندگی کا نام دیتے ہیں

انہی خوش رنگ لمحوں سے نئے موسم ابھرتے ہیں

دلوں میں اک نئی خوشبو میں ڈوبے آرزو کے پھول کھلتے ہیں

سفر بے نام منزل کے ہمارے ساتھ چلتے ہیں

کوئی بے نام سی خواہش دلوں کوگھیرلیتی ہے

ہمیں بے چین کرتی ہے 

کہاں پیکر میں ڈھلتی ہے

ہزاروں ان کہی باتیں ، بہت سے خواب آنكھوں میں

سفر کے اِس پڑاؤ میں ہمارے ساتھ ہوتے ہیں

اسی خواہش کے پہلو سے انہی خوابوں کے رنگوں سے

ہَم اک خوشبو کے جھونکے کو دلوں میں قیدکرتے ہیں

محبت نام دیتے ہیں

غم دُنیا کے قصے ہوں یا ان دیکھےجزیروںکے فسانے ہوں

محبت اپنے دامن میں سبھی محفوظ کرتی ہے

اسی سے ہر ملال اپنا اسی سے ہر خوشی منسوب ہوتی ہے

محبت یوں اک خوبصورت دائرے میں قیدکرتی ہےی

ہی بس زندگی محسوس ہوتی ہے

مگر پِھر یوں بھی ہوتا ہے

محبت روح میں تحلیل ہوتی ہے

تو اپنی ذات میں اک جستجو کا باب کھلتا ہے

نئے رستوں کا پیچِیدَہ سفر درپیش ہوتا ہے

فقط اک راستہ بن کر محبت ساتھ ہوتی ہے

نئی منزل کے راستوں میں کہیں رکنا نہیں ہوتا

پڑائو پِھر نہیں ہوتا

جب آنکھیں دھول ہوتی ہیں تو پِھر یہ راز کھلتا ہے

جسے ہَم زندگی کا نام دیتے تھے

فقط اک آرزو ہے ایک خواہش کی روانی ہے

بڑی لمبی کہانی ہے