Hichkiyon Ne Kisi Diwaar Mein Dar Rakha Tha

Hichkiyon Ne Kisi Diwaar Mein Dar Rakha Tha

Meray Aaba’a Ne Jab Is Khaak Pe Sar Rakha Tha

Ghar Se Nikley Thay Tou Ik Dasht-E-Fana Ki Soorat

Raah Mein Sirf Safar, Sirf Safar Rakha Tha

Dil Thay Matrooka’h Makanaat Ki Soorat Khaali

Aur Asbaab Mein Bichhrra Hua Ghar Rakha Tha

Jism Ajdaad Ki Qabron Se Nikaltey He Na Thay

Nasal Dar Nasal Is Khaak Mein Sar Rakha Tha

Rooh Par Naqsh Thay Woh Naqsh Abhi Tak Jin Mein

Rung Bachpan Ki Kisi Yaad Ne Bhar Rakha Tha

Dil Mein Sar Sabz Thay Us Pairr K Pattay Jis Par

Dast-E-Qudrat Ne Abhi Pehla Samar Rakha Tha

Kat’tey Daikhey Thay Woh Bargad Bhi, Jinho’n Ne Khud Ko

Muddato’n Dhoop Ki Basti Mein Shajar Rakha Tha

Jaltey Daikhey Thay Woh Khud Soz Mohalley Jin Mein

Janey Kab Se Koi Khuwabeeda’h Sharar Rakha Tha

Chorriyaan Toot K Bikhri Thi Har Ik Aangan Mein

Ik  Ku’nwaan  Tha Jo Tamannao’n Se Bhar Rakha Tha

Raah  Thi  Surkh  Gulabo’n  K  Lahoo Se  Roshan

Paaon  Rakha  Nahi  Jata  Tha  Magar  Rakha Tha

Qaafley  Aik  He Sarhad  Ki  Taraf  Jatey  Thay

Khuwab K Paar Koi Khuwab-E-Dagar Rakha Tha

Teergi  Cheer  K  Aaey  Huey  Rasto’n K  Liye

Aik  Mehtaab  Sar-E-Raah  Guzar  Rakha  Tha

Ik Haseen Chaand Tha Ik Sabz Zameen Par Roshan

Ik Sitarey Ko Bhi Aagosh Mein Bhar Rakha Tha

Harf-E-Izhaar Mein Hayal Thi Faseelein Lekin

Rakhne Waley Ne Khamoshi Mein Asar Rakha Tha

Lab Tak Aatey He Na Thay Harf Manajato’n K

Hichkiyo’n Ne Kisi Diwaar Mein Dar Rakha Tha

Chashm-E-Beena Mein Woh Manzar Abhi Taza Hai Saood

Meray Aaba’a Ne Jab Is Khaak Pe Sar Rakha Tha……….