Daikh masti wajood ki mairi
Ta-abad dhoom mach gayi mairi
Tu tawwajo idhar kare, na kare
Kam na hogi supurdagi mairi
Dil mera kab ka ho chuka patthar
Maut to kab ki ho chuki mairi
Ab to barbad kar chuke, ye kaho
Kya isi meiN thi behtari mairi?
Mere khush-rang zakhm daikhte ho
Ya'ani paRhtey ho shayeri mairi?
Ab teri guftugu se mujh pe khula
KyuN tabiyat udaas thi mairi
Zindagi ka ma'al itna hai
Zindagi se nahiN bani mairi
Chaand hasrat-zada sa lagta hai
Kya wahaN tak hai roshni mairi?
Ab maiN har baat bhool jata hooN
Aisi aadat na thi…K thi mairi?
Mairi aankhoN meiN aa ke baiTh gaya
Shaam-e-furqat ujaaR di mairi
Pehle seene meiN dil dhaRakta tha
Ab dhaRakti hai be-dili mairi
Kya ajab waqt hai bichaRney ka
Daikh rukti nahiN hansi mairi
Khud ko maire supurd kar baiTha
Baat tak bhi nahiN suni mairi
Tere inkaar ne kamaal kiya
Jaan meiN jaan aa gayi mairi
MaiN to pal bhar nahiN jiya 'Irfan'
Umr kis ne guzaar di mairi
No comments:
Post a Comment