عمر بھر عشق کسی طور نہ کم ہو- آمین

عمر بھر عشق کسی طور نہ کم ہو- آمین

دل کو ہر روز عطا نعمتِ غم ہو- آمین

میرے کاسے کو ہے بس چار ہی سِکّوں کی طلب

عشق ہو, وقت ہو, کاغذ ہو, قلم ہو- آمین

حجرہءِ ذات میں یا محفلِ یاراں میں رہوں

فکر دنیا کی مجھے ہو بھی تو کم ہو- آمین

جب میں خاموش رہوں رونقِ محفل ٹھہروں

اور جب بات کروں بات میں دم ہو- آمین

لوگ چاہیں بھی تو ہم کو نہ جدا کر پائیں

یوں مری ذات تیری ذات میں ضم ہو- آمین

عشق میں ڈوب کے جو کچھ بھی لکھوں کاغذ پر

خود بخود لوحِ زمانہ پہ رقم ہو- آمین

نہ ڈرا پائے مجھے تیرگیءِ دشتِ فراق

ہر طرف روشنیءِ دیدہءِ نم ہو- آمین

مِیر کے صدقے میرے حرف کو درویشی ملے

دور مجھ سے ہوسِ دام و درم ہو- آمین

میرے کانوں نے سنا ہے تیرے بارے میں بہت

میری آنکھوں پہ بھی تھوڑا سا کرم ہو- آمین

جب زمیں آخری حدّت سے پگھلنے لگ جائے

عشق کی چھاؤں میرے سرکو بہم ہو- آمین