ishq meñ ġhairat-e-jazbāt ne rone na diyā
varna kyā baat thī kis baat ne rone na diyā
aap kahte the ki rone se na badleñge nasīb
umr bhar aap kī is baat ne rone na diyā
rone vāloñ se kaho un kā bhī ronā ro leñ
jin ko majbūri-e-hālāt ne rone na diyā
tujh se mil kar hameñ ronā thā bahut ronā thā
tañgi-e-vaqt-e-mulāqāt ne rone na diyā
ek do roz kā sadma ho to ro leñ 'fākir'
ham ko har roz ke sadmāt ne rone na diyā
No comments:
Post a Comment